എ ഐ നടപ്പാക്കല്‍ അതിവേഗത്തില്‍: ജര്‍മ്മനിയില്‍ വിദഗ്ധര്‍ക്ക് ആശങ്ക

ഫ്രാങ്ക്ഫര്‍ട്ട്: ജര്‍മ്മന്‍ സര്‍ക്കാര്‍ ഭരണരംഗത്ത് നിര്‍മ്മിത ബുദ്ധി (എ ഐ) അതിവേഗം നടപ്പാക്കാന്‍ ശ്രമിക്കുമ്പോള്‍, ഈ സാങ്കേതികവിദ്യയുടെ ധാര്‍മ്മികവും ഉത്തരവാദിത്തപരവുമായ ഉപയോഗത്തെക്കുറിച്ച് വിദഗ്ധര്‍ക്കിടയില്‍ ആശങ്ക ഉയരുന്നു. അധികാരികള്‍ക്ക് സാങ്കേതികവിദ്യയെക്കുറിച്ച് വേണ്ടത്ര ധാരണയില്ലെന്ന് ആര്‍ ഡബ്ള്യു ടി എച്ച് ആക്കെന്‍ യൂണിവേഴ്സിറ്റിയിലെ എ ഐ പ്രൊഫസറും ഹംബോള്‍ട്ട് ഫൗണ്ടേഷന്‍ പ്രൊഫസറുമായ ഹോള്‍ഗര്‍ ഹൂസ് അഭിപ്രായപ്പെട്ടു.

നയരൂപീകരണത്തില്‍ വ്യവസായ താല്‍പ്പര്യങ്ങള്‍ക്ക് പകരം ശാസ്ത്രീയമായ ഉപദേശങ്ങള്‍ക്കാണ് സര്‍ക്കാര്‍ പ്രാധാന്യം നല്‍കേണ്ടതെന്ന് എ ഐ വിദഗ്ധര്‍ അടങ്ങുന്ന സംഘം നേരത്തെ ശുപാര്‍ശ ചെയ്തിരുന്നു. "ഒരു സര്‍ക്കാരിന് കഴിവുള്ള ഉപദേശം തേടാന്‍ ധാര്‍മ്മികമായ കടമയുണ്ട്. ചില പ്രത്യേക ഫലങ്ങളില്‍ താല്‍പ്പര്യമുള്ള വ്യവസായ ഉപദേശങ്ങളെ മാത്രം പിന്തുടരാന്‍ കഴിയില്ല," പ്രൊഫസര്‍ ഹൂസ് പറഞ്ഞു.

അതേസമയം, ചില വിദഗ്ധര്‍ ജെനറേറ്റീവ് എ ഐ (ഉദാഹരണത്തിന്, ചാറ്റ് ജി പി ടി) പോലുള്ളവയുടെ അതിപ്രചാരത്തിന് (ഹൈപ്പ്) സര്‍ക്കാര്‍ അടിമപ്പെടുന്നുണ്ടോ എന്നും സംശയം പ്രകടിപ്പിക്കുന്നുണ്ട്. ചാറ്റ് ജി പി ടി, ഡാല്‍~ഇ തുടങ്ങിയ എ ഐ ജനറേറ്ററുകള്‍ നല്‍കുന്ന വിവരങ്ങള്‍ക്ക് കൃത്യതക്കുറവുണ്ടായേക്കാം എന്ന പരിമിതി ലോകമെമ്പാടുമുള്ള കമ്പനികളും സര്‍ക്കാരുകളും തിരിച്ചറിഞ്ഞിട്ടുണ്ട്.

എ ഐ യുടെ ശ്രദ്ധ, ചോദ്യങ്ങള്‍ക്ക് മറുപടി നല്‍കുന്നതിനേക്കാള്‍, പ്രോസസ്സ് ഒപ്റ്റിമൈസേഷന്‍ (നടപടിക്രമങ്ങള്‍ മെച്ചപ്പെടുത്തല്‍) വഴി ഉദ്യോഗസ്ഥപരമായ തടസ്സങ്ങള്‍ എവിടെയൊക്കെ കുറയ്ക്കാം എന്ന് കണ്ടെത്തി സമയവും വിഭവങ്ങളും ലാഭിക്കുന്നതിലായിരിക്കണം എന്നും ഹൂസ് നിര്‍ദ്ദേശിക്കുന്നു.