പ്രധാന മാറ്റങ്ങളും വിവരങ്ങളും:
എന്താണ് പുതിയ മാറ്റം?
ഇന്റഗ്രേഷന്‍ കോഴ്സുകളുടെ ഭാഗമായി എഴുതുന്ന ഡി.ടി.സെഡ് (DTZ) പരീക്ഷ പാസാകുന്നതിനുള്ള രീതികളാണ് ആഭ്യന്തര മന്ത്രാലയം മാറ്റുന്നത്. ഇതുവരെ സംസാരിക്കുന്നതിനുള്ള (Speaking) പരീക്ഷയിലും ഒപ്പം എഴുത്തുപരീക്ഷയിലോ (Writing) കേള്‍വി~വായന (Listening & Reading) ഭാഗങ്ങളിലോ മികച്ച വിജയം നേടിയാല്‍ B1 ലെവല്‍ സ്വന്തമാക്കാന്‍ സാധിക്കുമായിരുന്നു. എഴുത്തുപരീക്ഷയില്‍ മാര്‍ക്ക് കുറഞ്ഞാലും മറ്റ് വിഭാഗങ്ങളിലെ ഉയര്‍ന്ന മാര്‍ക്ക് അത് ബാലന്‍സ് ചെയ്യുമായിരുന്നു. എന്നാല്‍ നവംബര്‍ 1 മുതല്‍ ബി1 (B1) വിജയം നേടണമെങ്കില്‍ സംസാരിക്കുന്നതില്‍ ബി1 നിലവാരത്തോടൊപ്പം, എഴുത്ത് അല്ലെങ്കില്‍ കേള്‍വി/വായനയില്‍ എന്നീ എഴുത്തുപരീക്ഷാ ഘടകങ്ങളില്‍ കുറഞ്ഞത് എ.2 (A2) ലെവല്‍ എങ്കിലും നിര്‍ബന്ധമായും നേടിയിരിക്കണം. എഴുത്തുപരീക്ഷ ഒഴിവാക്കാനോ വളരെ കുറഞ്ഞ മാര്‍ക്കോടെ കടന്നുപോകാനോ ഇനി സാധിക്കില്ല.
എന്തിനാണ് ഈ കടുത്ത നടപടി?
പരീക്ഷകളിലെ തട്ടിപ്പുകള്‍ തടയുന്നതിനും, ഔദ്യോഗിക കാര്യങ്ങള്‍ക്കും തൊഴിലിടങ്ങളിലും ദൈനംദിന ജീവിതത്തിലും ജര്‍മ്മന്‍ എഴുത്തുഭാഷയിലുള്ള പ്രാവീണ്യം ഉറപ്പുവരുത്തുന്നതിനുമാണ് നിയമങ്ങള്‍ കര്‍ശനമാക്കിയിരിക്കുന്നത് എന്ന് ഫെഡറല്‍ ആഭ്യന്തര മന്ത്രാലയം വ്യക്തമാക്കുന്നു.
പൗരത്വത്തെയും സ്ഥിരതാമസത്തെയും ബാധിക്കുമോ?
ഇല്ല. ജര്‍മ്മനിയില്‍ പൗരത്വത്തിനോ (Einbeurgerung) സ്ഥിരതാമസത്തിനോ ആവശ്യമായ ഭാഷാ യോഗ്യതാ പരിധിയില്‍ (B1 ലെവല്‍) മാറ്റമില്ല. നിയമം മാറുന്നത് പൗരത്വ നിയമങ്ങളിലല്ല, മറിച്ച് ഡി.ടി.സെഡ് സര്‍ട്ടിഫിക്കറ്റ് നേടിയെടുക്കുന്നതിനുള്ള പരീക്ഷാ നിബന്ധനകളിലാണ്.
മറ്റ് ഓപ്ഷനുകള്‍ ലഭ്യമാണോ?
ഡി.ടി.സെഡ് (DTZ) മാത്രമല്ല ബി1 യോഗ്യത തെളിയിക്കാനുള്ള ഏക മാര്‍ഗ്ഗം. ഗോഥെ സര്‍ട്ടിഫിക്കറ്റ് (GoetheZertifikat B1), ടെല്‍ക് (telc Deutsch B1), ഒ.എസ്.ഡി (OeSD) തുടങ്ങിയ അംഗീകൃത സര്‍ട്ടിഫിക്കറ്റുകള്‍ വഴിയും ഭാഷാ പ്രാവീണ്യം തെളിയിക്കാവുന്നതാണ്. ഇതിനകം സര്‍ട്ടിഫിക്കറ്റുകള്‍ നേടിയവരെ പുതിയ മാറ്റങ്ങള്‍ ബാധിക്കില്ല.
ജര്‍മ്മനിയില്‍ സ്ഥിരതാമസവും പൗരത്വവും ലക്ഷ്യമിട്ട് ഭാഷാ പഠനം നടത്തുന്ന പ്രവാസികള്‍ ഈ പുതിയ പരീക്ഷാ മാറ്റങ്ങള്‍ മുന്‍കൂട്ടി കണ്ട് എഴുത്തുപരീക്ഷകളില്‍ കൂടുതല്‍ ശ്രദ്ധ കേന്ദ്രീകരിക്കേണ്ടത് അത്യാവശ്യമാണ്.
Comments: