"അരുംകൊല നിര്‍ത്തുക' എന്നര്‍ഥം വരുന്ന തലക്കെട്ടോടെ ഒന്നാം പേജിലാണ് മുഖപ്രസംഗം പ്രസിദ്ധീകരിച്ചിരിക്കുന്നത്. ഒക്ടോബര്‍ ഏഴിന് നടന്ന ആക്രമണത്തോടുള്ള പ്രതിരോധം എന്നപേരില്‍ ഗസ്സയില്‍ കുട്ടികളടക്കം 30,000 പേരെ കൊന്നതിനെ ന്യായീകരിക്കാനാവില്ലെന്ന് ഇതില്‍ അര്‍ധശങ്കയ്ക്കിടയില്ലാത്ത വിധം വ്യക്തമാക്കുന്നു.
ലോകമെമ്പാടുമുള്ള ജൂതന്മാര്‍ക്കെതിരായ അക്രമങ്ങള്‍ വര്‍ധിക്കുന്നതിന് ഇസ്രായേലിന്റെ ഈ അരുംകൊല പ്രേരകമാകുമെന്ന് റോം ആസ്ഥാനമായുള്ള ഹോളോകോസ്ററ് അതിജീവിത എഡിത്ത് ബ്രൂക്ക് പറഞ്ഞിട്ടുള്ളതും മുഖപ്രസംഗത്തില്‍ ചൂണ്ടിക്കാട്ടുന്നു. വത്തിക്കാന് എഡിറ്റോറിയല്‍ ഡയറക്ടര്‍ ആന്‍ഡ്രിയ ടര്‍ണിയല്ലിയാണ് എഡിറ്റോറിയല്‍ എഴുതിയിരിക്കുന്നത്.
പരിശുദ്ധാത്മാവ് എപ്പോഴും ഇരകളുടെ പക്ഷത്താണെന്നും ഇതില്‍ ഓര്‍മിപ്പിക്കുന്നു. നിരായുധരായ സാധാരണക്കാരാണ് ബോംബാക്രമണങ്ങളുടെയും വെടിവയ്പ്പുകളുടെയും ഇരകളെന്ന് ഫ്രാന്‍സിസ് മാര്‍പാപ്പ പറഞ്ഞതിനെയും എഡിറ്റോറിയല്‍ ഉദ്ധരിച്ചിട്ടുണ്ട്.
അതിനിടെ, ഇസ്രായേല്‍ നടത്തുന്ന കൂട്ടക്കൊലയെ അപലപിച്ച വത്തിക്കാന് സ്റേററ്റ് സെക്രട്ടറി കര്‍ദിനാള്‍ പിയട്രോ പരോളിനെതിരെ പരാതിയുമായി ഇസ്രായേല്‍ രംഗത്തെത്തി. കര്‍ദിനാളിന്റെ പരാമര്‍ശങ്ങള്‍ ഖേദകരമാണെന്ന് ഹോളി സീയിലെ ഇസ്രായേല്‍ എംബസി വത്തിക്കാന് നല്‍കിയ ഔദ്യോഗിക പരാതിയില്‍ പറഞ്ഞു. ഇസ്രായേല്‍ സൈന്യം അന്താരാഷ്ട്ര നിയമം അനുസരിച്ചാണ് പ്രവര്‍ത്തിക്കുന്നതെന്നും സിറിയ, ഇറാഖ്, അഫ്ഗാനിസ്ഥാന്‍ എന്നിവിടങ്ങളിലെ യുദ്ധങ്ങളെ അപേക്ഷിച്ച് കൊല്ലപ്പെട്ട ഫലസ്തീന്‍ സിവിലിയന്മാരുടെ അനുപാതം കുറവാണെന്നും എംബസി അവകാശപ്പെട്ടു.
Comments: