ട്രംപ് വന്നപ്പോള്‍ വീണ ഹിന്‍ഡന്‍ബര്‍ഗ്

അടുത്ത കാലത്തായി ഇന്ത്യന്‍ വ്യവസായ ഭീമന്‍ അദാനി ഗ്രൂപ്പിനെ വരെ മുള്ളില്‍ നിര്‍ത്തിയ ഹിന്‍ഡന്‍ബര്‍ഗ് റിസര്‍ച്ച് സ്ഥാപനത്തിനു പൂട്ടു വീണു.നേറ്റ് ആന്‍ഡേഴ്സണ്‍ ആണ് ഈ സ്ഥാപനത്തിന്‍റെ ഉടമ. വിവാദ വാര്‍ത്തകളുടെ സൃഷ്ടാക്കളായ ഹിന്‍ഡന്‍ബര്‍ഗ് റിസര്‍ച്ച് പൂട്ടാനുള്ള കാരണമെന്തെന്ന അന്വേഷണത്തിലാണ് നെറ്റിസണ്‍സ്. തൊഴില്‍ സമ്മര്‍ദ്ദം മൂലമാണ് താന്‍ സ്ഥാപനം അടച്ചു പൂട്ടുന്നതെന്നാണ് ആന്‍ഡേഴ്സണിന്‍റെ പക്ഷം. കഴിഞ്ഞ എട്ടു വര്‍ഷങ്ങളായി ഭൂരിഭാഗവും താന്‍ ഓരോ പോരാട്ടത്തിലായിരുന്നു എന്നാണ് വാള്‍സ്ട്രീറ്റ് ജേര്‍ണിന്‍റെ റിപ്പോര്‍ട്ടറോട് ആന്‍ഡേഴ്സണ്‍ പറഞ്ഞത്. ട്രംപിന്‍റെ വിജയത്തോടെ അദാനിയുടെ ശക്തനായ വിമര്‍ശകനായ ആന്‍ഡേഴ്സന്‍റെ സ്ഥാപനം അടച്ചു പൂട്ടി എന്നത് ശ്രദ്ധേയമാണ്.

ഇന്ത്യയുടെ സാമ്പത്തിക വളര്‍ച്ചയ്ക്കു തടയിടാന്‍ അമെരിക്ക കൊണ്ടു വന്ന ചട്ടുകമാണ് ഹിന്‍ഡന്‍ബര്‍ഗ് റിസര്‍ച്ച് എന്ന നിരീക്ഷണവും നിരവധി രാഷ്ട്രീയ നിരീക്ഷകര്‍ നടത്തിയിരുന്നു. ഉലയേണ്ട സാമ്രാജ്യങ്ങളെ തങ്ങള്‍ ഉലച്ചു എന്ന ആന്‍ഡേഴ്സണിന്‍റെ വെളിപ്പെടുത്തല്‍ വ്യക്തമാക്കുന്നത് ഈ രാഷ്ട്രീയ നിരീക്ഷണം ശരിയാണെന്നാണ്.

പൊതു, സ്വകാര്യ വിപണികളിലെ വേട്ടയാടല്‍ തട്ടിപ്പുകളില്‍ നിന്നും മറ്റു പ്രശ്നങ്ങളില്‍ നിന്നും എങ്ങനെ ഒരു ബിസിനസ് കെട്ടിപ്പടുക്കാന്‍ സാധിക്കുമെന്ന് കാണിച്ച് താനും തന്‍റെ സ്ഥാപനമായ ഹിന്‍ഡന്‍ബര്‍ഗും ചെയ്യാനാഗ്രഹിച്ച കര്‍മങ്ങള്‍ പൂര്‍ത്തിയായതായും സമാന താല്‍പര്യമുള്ളവര്‍ക്ക് അവരുടെ സ്വന്തം അന്വേഷണങ്ങള്‍ക്ക് ഹിന്‍ഡന്‍ബര്‍ഗിന്‍റെ തന്ത്രങ്ങള്‍ ഉതകും വിധം തങ്ങളുടെ വിഭവങ്ങളും പരിശീലന സാമഗ്രികളും ഉടന്‍ പങ്കിടുന്നതിനുള്ള സന്നദ്ധതയും ആന്‍ഡേഴ്സണ്‍ വാള്‍ സ്ട്രീറ്റ് ജേര്‍ണലുമായി പങ്കു വച്ചു.