ഇനി മൂത്ര പരിശോധനയിലൂടെയും ക്യാന്‍സര്‍ കണ്ടെത്താം

മൂത്ര പരിശോധനയിലൂടെ ശ്വാസ കോശാര്‍ബുദത്തെ തുടക്കത്തില്‍ തന്നെ കണ്ടെത്താമെന്ന് കാംബ്രിഡ്ജ് യൂണിവേഴ്സിറ്റിയിലെ ഗവേഷകര്‍. ശ്വാസ കോശാര്‍ബുദം ആദ്യഘട്ടത്തില്‍ കണ്ടെത്തുന്നത് വളരെ അപൂര്‍വമായാണ്. ചികിത്സയ്ക്കും പരിമിതിയുണ്ട്. തുടക്കത്തിലേ അസുഖം കണ്ടെത്തിക്കഴിഞ്ഞാല്‍ മെച്ചപ്പെട്ട ചികിത്സ നല്‍കാന്‍ സാധിക്കുമെന്നാണ് ഗവേഷകര്‍ പ്രതീക്ഷിക്കുന്നത്. നിലവില്‍ ഈ പരിശോധന ഏറെ ചെലവേറിയതാണ്. കാംബ്രിഡ്ജ് യൂണിവേഴ്സിറ്റിയിലെ ഗവേഷകരും ക്യാന്‍സര്‍ ഇന്‍സ്ററിറ്റ്യൂട്ടും ഒരുമിച്ചാണ് ഈ പരിശോധന നടപ്പാക്കുന്നത്. ലങ് ക്യാന്‍സറിന്‍റെ ആദ്യഘട്ടത്തില്‍ തന്നെ ശരീരത്തില്‍ ഉത്പാദിപ്പിക്കപ്പെടുന്ന സോംബി എന്നറിയപ്പെടുന്ന സെല്‍ പ്രോട്ടീനുകളെ കണ്ടെത്തുന്നതിനായാണ് ഈ ടെസ്ററ്.

ശരീരത്തില്‍ തുടരുന്ന ജീര്‍ണിച്ച അല്ലെങ്കില്‍ കേടുപാടുകളോടു കൂടിയ കോശങ്ങളാണിവ. എന്നാല്‍ ഇവ വീണ്ടും വളരുകയോ വിഭജിക്കപ്പെടുകയോ ചെയ്യാറില്ല. പക്ഷേ ഈ കോശങ്ങള്‍ അവയുടെ ചുറ്റുപാടും ക്യാന്‍സര്‍ കോശങ്ങള്‍ രൂപപ്പെടാനുള്ള സാഹചര്യമുണ്ടാക്കുമെന്നാണ് ഗവേഷകര്‍ പറയുന്നത്. ഇവ ഒരു തരം പ്രോട്ടീന്‍സും ഉത്പാദിപ്പിക്കുന്നുണ്ട്.

ഈ പ്രോട്ടീനുകളുമായി ചേര്‍ന്ന് ഒരു തരം മിശ്രിതം ഉത്പാദിപ്പിക്കാന്‍ പ്രാപ്തമായ ചില പദാര്‍ഥം ഇന്‍ജക്ഷനിലൂടെ ആദ്യം ശരീരത്തിലെത്തിക്കും. ഇവ പ്രോട്ടീനുമായി പ്രതിപ്രവര്‍ത്തിച്ച് മിശ്രിതം രൂപപ്പെട്ടാല്‍ അതിന്‍റെ സാന്നിധ്യം മൂത്രത്തില്‍ നിന്ന് അറിയാന്‍ സാധിക്കും. ഈ പരിശോധനയാണ് ശ്വാസ കോശാര്‍ബുദത്തെ കണ്ടെത്താനായി ഉപയോഗിക്കുന്നത്. എലികളില്‍ ഈ പരീക്ഷണം വിജയകരമായി പരീക്ഷിച്ചു കഴിഞ്ഞു. വൈകാതെ മനുഷ്യരിലും പ്രയോഗിക്കാന്‍ സാധിക്കും.